19/06/2026 a las 12:04h.

Periodista, escritor y traductor de clásicos contemporáneos, Paco Álvarez (Xixón, 1970) tien avezaos a los sos llectores a la bona costume d'ofrece-yos siemprematerial fresco en cada llibru nuevu. Ayer presentaba na Feria del Llibru de Xixón, la novela 'Coses que facer en Xixón cuando tas muertu' (Impronta), cola qu'algamó'l Premiu Andres Solar Santurio, entamáu pol conceyu de la so ciudá natal y a la que vuelve agora con esta historia de tintes negres, después de dexala va unos dos años pa residir fuera d'Asturies.

El Xixón de los 90 ye «el principal protagonista humanu» de la novela, talo nos desvelaba el propiu autor, hores enantes de la presentación. Un protagonismu que comparte col del oficiu periodísticu qu'Álvarez escomenzaba a exercer esos años nesta mesma cabecera y que na trama lliteraria, encarna el personaxe principal d'una reportera qu'investiga un misteriosu crime.

Alrrodiu del propiu xéneru del llibru, l'escritor apunta que «supongo que puede ser una novela negra, pero tamién memorialista y periodística, con muncho de reportaxe noveláu o novela reportaxeada». Un calter que la venceya en parte a títulos anteriores suyos como 'Lluvia d'agostu' o 'Los xardinos de la lluna', inda'l so autor matiza con humor que «en tou casu les míes son noveles negres de baxa intensidá».

A propósitu d'ello, Álvarez afirma nun considerase narrador d'esti xéneru, «pero sí creo que tengo una buelga que me quedó ehí y que ta nel orixe d'esta historia, un fechu biográficu(que cuenta la protagonista Olaya Mallada, el mio alter ego lliterariu nesti casu) y ye que yo estrenéme como periodista en 'A Quemarropa', el periódicu de la Selmana Negra,na so segunda edición. Esi mesmu branu llamóme EL COMERCIO pa facer práctiques.Por eso, como diría un futbolista, yo soi de doble cantera: de A Quemarropa y de EL COMERCIO». Esa esperiencia, la d'exercer l'oficiu informativu na dómina predixital y nuna ciudá mui distinta a la que conocemos güei refléxase, como'l retratu d'esi paisaxe social, con una fonda veracidá nuna novela que paña'l títulu, revela Álvarez, de la película 'Coses que facer en Denver cuando tas muertu', qu'a la so vez lu sacaba d'una canción de Stephen Jones. El reconocimientu al préstamu aparez nun diálogu de dos de los sos personaxes principales.

En cuantes a la pulsión d'escribir esta historia, el so autor, asegura que «nes mios noveles ta reflexao lo qu'echo de menos nesi momentu. Pongo por casu 'Lluvia d'agostu', apela a la épica d'unos personaxes que nun se doblegaron en circunstancies bien abegoses y respuende a unmomentu nel que yo tenía l'autoestima pelos suelos.

Nesti casu, va dos años que marché de Xixón y sentía la necesidá d'un regresu mental. Tenía una delda pendiente cola ciudá na que viví más de mediu sieglu».

La qu'atopamos equí ye la del prodixosu añu 92 «nel qu'Asturies y Xixón quedaon fuera de focu, a nun ser pa los que vivíemos equí», un tiempu de desmantelamientu del texíu industrial y grandes tresformaciones urbanes. «El muertu y el sucesu ye un pretestu pa falar d'esa ciudá y del periodismu d'entós. Aprovechéme del muertu p'alimentar la novela», expresa Álvarez d'esta historia na que presta entrar y de la que cuesta salir, como ye marca de la casa.