29/05/2026 a las 10:00h.

Ganadora en 2022 del Premiu Enriqueta González Rubín con 'La tráxica hestoria de cómo Abrahán mató la música' (Impronta), Beatriz Quintana Coro (Llangréu, 1995) acaba publicar col sellu Trabe 'La fía del mineru', una obra bien distinta de la que nos fala.

–Fáiseme que nun fai falta preguntar si la fía del mineru ye vusté.

–Sí, sería yo.

–¿Y esti llibru ye un ensayu autobiográficu?

–A ver, yo creo que, lliterariamente, ye autoficción. Pero yo piénsolu como un ensayu que diba ser sobre un accidente onde morrió mio pa y acabó siendo sobre la aventura de deprender yo lo que-y pasó. Y qu' al final, según se llee, va transformándose de dalgo más técnico y con más datos, en dalgo más personal.

–¿Qué tiempu tenía y cómo pasó?

–Yo tenía cinco años y picu.Foi nel Pozu María Luisa, el siete de payares del 2000, y a diez minutos de terminar el turnu de trabayu.

–Paezme tremendo.

–Sí, y a mí tamién me resulta increíble, y cómo resulta que les casualidaes a veces van una tres d'otra, y nun tienen sentíu. Bono, les coses son asina, y ya ta, porque por munches vueltes que se dean y de les coses que se puedan estraer bastante bien de la obra, al final, qué más da lo que diga l'informe o tolo que haya investigao, si fue una casualidá.

–¿Esi foi el motivu que l'afaló nesta busca?

–Nel ensayu parto dende cero porque lo yo sabía yera nada. Sabía los fechos, lo que pasara, pero en realidá tampoco tuvi munchu interés nunca pola mina, nin nada d'eso. Entós lo poco que sabía nin siquier lo entendía.

–¿Quier dicir qu'escribilo foi entamar un procesu d'autoindagación?

–Sí, sí, ye como un resumen, una esplicación del mio procesu de investigación y lo que deprendí sobre el accidente y sobre mí.

–Facelo nun debió ser fácil, sicasí el resultáu ye un testu que se llee con muncha claridá y cenciellez.

–Yo espero que seya una llectura fácil a nivel lliterariu, pero bono, ufierta una lectura tamién muncho más emocional, los sentimientos son mui importantes equí.

–Supón al empar una aportación interesante a l'autoficción, un xéneru que nun se cultivó abondo na nuestra llingua, quitando la maxistral escepción de Xuan Bello.

–Sí, a mí la verdá ye un xéneru que me presta muchísimo y sí que veo que n'asturiano topase muy poco de ello, tamién en castellano, anque agora tán empezando aparecer más autores qu'opten pola autoficción, pero yo, en xeneral, la mayoría de lo que lleí ye n'inglés: dende los ochenta, noventa hai muncha producción y de muncha calidá. Y tamién me presta que me dieran la oportunidá de sacar alantre'l manuscritu, porque pienso que ye un llibru que si yo fuera llectora gustaríame lleer. Toi d'alcuerdu que ye un güequín qu'hai que dir enllenando.

–¿Foi difícil dar el pasu de publicar una historia tan personal?

–Al escribilo pensaba más bien n'aspectos técnicos, como si esto s'entiende o non y tenía ilusión en velo nun llibru, pero cuando llegó'l momentu sí sentí un poco mieu. Nun foi hasta que lu tuve nes manes que pensé que podía ayudar a entender la minería d'una forma más humana, non namás la industria, el cierre los pozos, etc. Eso ye lo que me prestaba qu'atopase la xente al lleelu.