Fueron cerca de cuarenta años de bregar con alcaldes y conceyales. Un gremiu, el de lo políticos locales, con bastante mala prensa. Hai de too na viña del Señor. Tengo bon recuerdu d'alcaldes colos que me tocó trabayar nel Valle de Baztan, Barañain y Castejón (toos ellos en Navarra), en Granada, n'Uviéu y en Mieres, en casique tolos tiempos democráticos: Carbajal, Losa, Porrón, Luis María, Aníbal y Manuel. El alcalde d'aquella nel Baztan, a finales de los noventa, yera d'Eusko Alkartasuna. El mio trabayu consistía en sacar alantre'l proyectu d'una rede de teatros y conciertos en tola comunidá, na que participaran tanto'l norte, como'l centru y el sur. Tres Navarres bien distintes. L'alcalde taba conforme con sacar el proyectu. Pero, como tantes otres veces, siempre toca tratar col conceyal que quier ser califa nel llugar del califa. Delantre de mi procuraba falar n'euskera pa que nun la entendiera. Yo, de toles formes, tomaba nota de too. Como que lo entendía. Anquen nun fuera más que pa fastidiar. Comenté-y la hestoria a la responsable de cultura d'Elizondo. Rióse d'ella con un comentariu enforma xenófobu: «Fálate n'euskera porque los padres son de La Rioja, pa facese que ye más vasca que naide». Pero nun dexaba de tener razón. Ella, que yera del valle, descendiente d'agotes, falaba n'euskera, francés y castellanu, según el contestu nel que tuviera. Porque entendía lo más normal d'esti mundu, que le llingües son pa facese entender. N'Uviéu pasóme tamién una vez dalgo asemeyao con estes tonteríes llingüístiques. Nel Teatru Campoamor, el conceyal de turnu dizme con motivu d'una grabación: «¿Nun se t'ocurrirá falar en bable?» Yo, riéndome directo na cara, contesté-y: «Yo nun voi falar. Pero a ver si t'atreves a dici-y al alcalde que nun fale en bable». Miróme asustáu (como suel mirar el conceyal combayón y llambeculos que siempre hai en toles corporaciones): «¿Nun me jodas que l'alcalde va emplear bable?». Púnxe-y cara de «ye lo qu'hai». Y él, como bon acoyonáu de la vida municipal, dio la vuelta y esmucióse del escenariu. L'alcalde, como yera normal, faló de lo que quixo y empleó la llingua que-y dio la gana. En Mieres mesmo, onde tantu conceyal va de ser d'Eusko Alkastasuna, cuando l'alcalde ye de la internacionalista Izquierda Xunida, tovía tuve tiempu enantes de xubilame pa reíme de dalgún conceyal/a que venía a dar llecciones d'asturianu, cuando tovía conservo les sos notes enllenes de faltes d'ortografía. Lo de siempre: la ignorancia que s'atreve a too. Tovía-y lo pude comentar a Anibal Vázquez de la que lo dexé: «Vas quedar como un bon alcalde arrodiáu de malos conceyales». A lo qu'él contestó: «¡Prubitinos!» –colo guapo que-y quedaba l'acentu de Mieres pa dicir estes coses– ¡Y dícesmelo tu, valiente castrón tas fechu!».