La busca del Santu Grial siempre tuvo dalgo de maratón épicu, con paraes pa comer y con hestories pan nun dormir. Dende enantes de los caballeros del Rei Arturu hasta arqueólogos d'anguañu con más moral que presupuestu, xeneraciones enteres persiguieron esi copón llexendariu que, d'alcuerdu cola tradición, utilizó Xesucristu na Última Cena. Colo que los viaxeros del Santu Grial yá lleven daes bien de vueltes al mundu detrás d'esi suañu.

Yá nel tiempu de la primera película d'Indiana Jones, ún de los principales candidatos a copón auténticu yera'l cáliz custodiáu na Catedral de Valencia. Milenta y milenta turistes y fideles lleven desfilao delantre d'él con una mecigaya de devoción y dulda. La mesma dulda que nos xenera un túpper escaecíu na nevera. La mesma devoción que punxeron al dar misa con él nes manes Xuan Pablu II y Benitu XVI.

Por coses asina vine a Llïón va poco y vuelvo estos díes de Selmana Santa. De xuru que tendrá más xente'l xueves santu alcohólicu de San Xenarín, pero tamién habéis dar una vuelta pela Basílica de San Isidoro. Les coles débense más a Netflix qu'a la fe, pero ye que les últimes investigaciones apunten agora a que'l Santu Grial tuvo tola vida nesta Basílica baxu'l nome de cáliz de la reina Doña Urraca. Un viaxe dende tierra santa hasta les Tierres de Llïón, del que se guarden documentos nel archivu xeneral d'Exiptu que lo atestigüen. Yá quixera Indiana Jones tener un documental en Netflix tan prestosu.

Miro dende la ventana del hotel nel que toi y nun paro de ver pasar pelegrinos. Les vidrieres de la catedral siempre fueron la estrella. Esti añu'l Santu Grial de Doña Urraca tá ganándo-y la partida. El mesmu Camín de Santiagu xeneral pasa per delantre de la catedral y de la basílica. Da tiempu a sacar foto al rosetó de la primera y entrar na segunda a ver el cáliz. La Ilesia yá vio'l negociu y cobra por visitar per dientro una y por enseñate otra. Y la xente paga porque sabe que paga la pena.

Con too, en llegando la tarde y averando la nueche, vese que los pelegrinos sintieran falar tamién del Húmedo y del Romántico y tán los chigres de «limonada» y pinchos hasta la bandera. Disfrutar del Camín tamién ye eso, un poco de cultura llexendaria, otru pocu de fervor relixosu y bien d'ello de prieto picudo y cecina. Recomiendo les tres pasiones: siguir el rastru del Grial de Doña Urraca y atropar la fe relixosa y el prieto picudo na procesión de San Xenarín. Llïón tá equí a la vera y bien que presta.