El 23 del mes de San Xuan de 1981, poques hores enantes d'entamar la danza prima na plaza del ayuntamientu, entrevistaba na so casa de Mieres a Carmen Vigil, fía del notariu Justo Vigil, sobrina del folclorista Fausto Vigil. En regresando a Mieres dende Berlín, finalizada la II Guerra Mundial, Carmen Vigil dirixó la Sección Femenina, coordinando la danza prima de la nueche de San Xuan.

Malapenes pasaran cuatro meses del intentu de güelpe d'estáu del 23F. Arriendes de falar sobre la danza prima, en dellos momentos preguntóme sobre cómo viviera los socesos d'aquel día. Taba acabante de ver les respuestes que m'aportara en relación al carácter racial de la danza alredor del fuéu y les referencies a los Wandervogel (asociación xuvenil alemana tipu OJE) y al pensamientu del filósofu Hanns Hörbiger, de gran predicamentu na Alemania nazi. Asina que, con esos precedentes y col fechu de que fuera de les organizadores del funeral d'Adolfo Hitler na ilesia de San Xuan de Mieres, dexéla falar. Y bien que lo fizo. Tengo documentación d'entós y guardo cartes personales d'implicaos nel 23F con ella.

Dalgo interesante me comentara: el nazismu en Mieres fuera un movimientu importante ente l'alta burguesía y profesionales del llugar, por simple despreciu a los miembros de la Falanxe, a los que consideraben el proletariáu del réximen. Ellos yeren la élite. Asina, con total llixereza (la xente dicíame que ya chocheaba), Carmen Vigil me falara de como pela so casa de Mieres pasaran nos años setenta miembros de la ATE (Antoterrorismu ETA), de la Triple A, de guardies civiles implicaos cola OAS, de la Operación Reconquista (un asuntu carlista) y de la rede Gladio. D'esta última nun sabía nada hasta que la descubrí bien de tiempu alantre, en 1990, na revista 'Tiempo', onde se dicía que «existió una rede Gladio en España durante el franquismo, que actuó contra militantes comunistas y anarquistas, así como contra mineros asturianos y nacionalistas catalanes y vascos».

Falé notros artículos d'aquel Mieres punteru alredor de la cai El Viciu. Pero, ensin escaecer que naquella cai y alredores esistíen tovía entós llugares como La Terraza, el Bar Gol, La Madrileña… nel que se xuntaben los últimos rescoldos del sueñu nazi mierense, baxo'l retratu na paré de Francisco Franco, José Antonio Primo de Rivera y José Antonio Girón de Velasco. Demientres los cachorros de nueva xeneración xuntábense nel Mausoleo –onde facía ostentación d'un bate beisbol ún de los encargaos– y preparaben acciones anti too dende un localín na cai Martínez de Vega. Hasta que'l 23F los dexó col culu al aire: quedaben cuatro y nun yeren naide. Al más tontu d'ellos diéron-y aquella tarde una somanta palos a l'altura del Yaracuy. A otru, que yera abogáu amás de fascistucu, riéronse bien d'él y quitáron-y una pistola que llevaba. Díes depúes andaba rogándo-yos peles esquines que-y la devolvieran, que yera un recuerdu del padre.