Tuve bien de comentarios sobre la presencia de Camilo Sesto en Mieres, xunto a otros, como Serrat o Rafael Alberti. Y amás d'añadir dalgún otru nome d'aquel tiempu, recalcáronme la importancia que yá tuviera'l llugar nes décades anteriores, los 60 y 50, cuando per Mieres pasaron grandes estrelles como Concha Piquer, Antonio Amaya o Estrellita Castro. De toos ellos pasáronme entraes y anuncios de la so actuación nel Teatru Capitol. Tamién referencies d'Antonio Machín, Juanito Valderrama, Juanita Reina, Rafael Farina, Lola Flores, Lilián de Celis y Antoñita Moreno.

D'Antoñita Moreno tengo l'alcordanza de tar presentes mios padres nel conciertu. Tovía anden per casa un par de discos d'ella, un single con 'Carretera de Asturias' y un LP con canciones asturianes y gallegues. El conciertu d'Antonio Machín, nel Teatru Pombo, ye ún de los mio primeros recuerdos infantiles, por asistir a él xunto a mios padres tamién. De teloneru tuvo el Trío Sanjuanín, que yeren de Santa Marina y naquel tiempu grabaron un par de discos, con un enorme éxito (tovía güei cantes canciones d'ellos pelos chigres y nun lo sabes).

De la estancia en Mieres de Lola Flores cuéntense una montonera de coses. De mano, que l'actuación tuvo llugar nel Café Carolina. Que'l contratu fue por quince díes, a actuación diaria. Y que los quince díes tuvo nel Hostal Ayala a cuerpu reina, too pago por un reputáu médicu mierense. La cosa dio tanto que falar que me llegó esta mesma hestoria por cuatro informantes diferentes. El paisanu, como bon mierense, dormía nel hostal, almorzaba con Lola y diba a misa de diez cola muyer, pa confesase.

Lilián de Celis tuvo varies veces en Mieres. De mano, depués del enorme éxitu de la película 'Alma aragonesa'. La última vez, munchos años más tarde, cuando se-y fizo un ciclu enteru de películes a primeros de los años 2000 y vino ella en persona a presentar cada una de les películes. Fue una gran estrella de los años 50 y 60, y siguía siéndolo nel nuevu sieglu.

Y, como non, cuando cuentes estes hestories, bien de xente me recuerda la estancia de Françoise Hardy en Mieres nel branu de 1964, cuando yera la más grande estrella de la música francesa y vendía discos como churros. Pa escondese d'aquel mundu d'éxitos, fans y paparazzis, François Hardy vino con una amiga de Santa Marina a pasar unos díes con ella. Como yera normal, la so belleza nun pasó desapercibida y, en nada, fue reconocida pola farmacéutica del barriu –según la más grande parte de los informantes–. Y asina, igual que vino, tuvo de desapaecer. Per Mieres meyor pasar d'incógnitu.