Мадэль з Харкава Ніка Кузняцова пабралася шлюбам з грузінскім бізнэсменам Нікам Ломіа ў адной з самых дарагіх віл у Канах. Спявалі для маладзёнаў і іх гасцей Рыкі Марцін, Валерый Меладзэ, Максім Галкін.

Ніка Ломіа і Ніка Кузняцова. Тут і далей фота з сацсетак

Нявеста — Ніка Кузняцова — нарадзілася ў Харкаве. У 2021 годзе яна стала фіналісткай конкурсу прыгажосці «Міс Украіна», але нейкага тытулу не атрымала. СМІ пішуць, што пасля пачатку вайны Ніка пераехала ў Манака.

Ніка Кузняцова, мадэль з Харкава

У інстаграме дзяўчына распавядала, што ў дзяцінстве марыла стаць дызайнеркай. У 11 гадоў пайшла ў мадэльную школу. А вучыцца паступіла на эканамістку-міжнародніцу. Папрацаваць Ніка паспела хостэс-адміністратаркай, аператаркай у кол-цэнтры, прамоўтаркай, мадэллю — і яшчэ шмат кім. Кажа, умее рабіць сайты, засвоіла 3Д-мадэляванне, можа быць дызайнеркай інтэр’ераў.

Ніка Ломіа, грузінскі бізнэсмен

Жаніх — Ніка Ломіа — грузінскі бізнэсмен, які з'яўляецца сузаснавальнікам IT-кампаніі Spribe. Яна займаецца распрацоўкай платформ для анлайн-казіно і мае офісы ў Кіеве і Варшаве. Некаторыя паблікі звязваюць яго з махлярскімі кол-цэнтрамі.

У сваім блогу ў інстаграме Ніка распавядала, што пазнаёмілася з будучым мужам у сацсетках. А першае іх спатканне прайшло ў «Макдональдсе». Кажа, што сама яна вельмі простая дзяўчына і любое спатканне можа быць рамантычным, калі побач правільны чалавек.

Ніка прызнаецца, што апошнім часам адышла ад працы, бо лічыць неабходным больш займацца сям’ёй. Гатуе яна сама, а вось з прыборкай ёй дапамагаюць.

Закаханыя арганізавалі вяселле ў адной з самых дарагіх віл у Канах — Château de la Croix des Gardes. Яна была пабудавана ў 1919 годзе. Каб вы разумелі ўзровень пляцоўкі: тут праводзілі свае мерапрыемствы такія кампаніі, як Versace і Apple. Тут жа адбывалася эксклюзіўная вечарынка закрыцця Канскага кінафестывалю. Кошт арэнды вілы цалкам на два дні (а менавіта столькі святкавалі вяселле) можа даходзіць да 500 тысяч еўра.

Гасцей сустракала трыа скрыпачак.

А пляцоўку, дзе маладзёны абмяняліся клятвамі кахання і вернасці, усталявалі так, каб госці маглі атрымліваць асалоду ад цудоўнага віду на Міжземнае мора.

Шкляны подыум, упрыгожаны тысячамі кветак, зрабілі проста пасярод басейна — па ім шлі жаніх і нявеста.

Адных толькі фатографаў, якія здымалі радасную падзею, было шэсць.

Само мерапрыемства праходзіла на рускай мове.

Вядучымі абралі расійскага артыста Максіма Галкіна і вядомага беларускага вядучага Яўгена Перліна.

Быў і шыкоўны феерверк, і шоу дронаў у начным небе, якія рабілі розныя малюнкі.

Забаўляльную праграму таксама прадумалі — танцы балерын, песні ў выкананні Максіма Галкіна (у тым ліку, і на ўкраінскай мове) і Валерыя Меладзэ. Але галоўнай запрошанай зоркай стаў Рыкі Марцін — шчаслівыя муж і жонка скакалі пад яго хіт Un, Dos, Tres.

Другі дзень вяселля зрабілі нацыянальным. Тут гасцям прапаноўвалі як сала з цыбуляй і боршч з пампушкамі, так і хінкалі.

Госці таксама імкнуліся дадаць да касцюмаў нейкія нацыянальныя элементы.

Нявеста з сяброўкамі танчыла пад украінскую музыку.

Традыцыйныя грузінскія танцы ад артыстаў грузінскага нацыянальнага балета «Сухішвілі» таксама былі. Выступаў грузінскі спявак Бека Браладзэ.

Па інфармацыі СМІ, ганарар Рыкі Марціна ў такіх выпадках звычайна складае 1,5 мільёна еўра, Максіма Галкіна — 118 тысяч (але трэба ўлічваць, што ён працаваў 2 дні, таму ганарар мог быць і большым), Валерыя Меладзэ — каля 146 тысяч. Агулам такое шыкоўнае вяселле магло каштаваць да 5 мільёнаў еўра.

Усе навіны →