Mutrikuko herriak 'Ondarea gure eskuetan' lelopean ospatuko diren 2026ko Ondarearen Europako Jardunaldiekin bat egin du.

Hori dela eta, Mutrikuko historia eta etonografia berreskuratzeko lan egiten duen Esparbela elkarteak eta Udalak nahi duten herritar guztien partaidetzari irekitako bi jarduera antolatu dituzte, beti ere, «herriko ondareari eta tradizioei buruz gehiago ezagutzeko».

Ekintza horiek urriaren 3an eta 10ean egingo dira, euskeraz, eta parte hartu nahi dutenek turismo@mutriku.eus helbidera idatzi edo 943 60 33 78 zenbakira dei egin dezakete lekua gordetzeko (doanik da).

Ondarearen Europako Jardunaldien harira prestatutako egitaraua abiatzeko Mutrikuko arrain-kontserben tradizioaren historia eta ondare materiala ezagutzeko bisita komentatua egingo da urriaren 3an (10:00etan Loja Zaharreko arkupetatik).

Ibilbidean zehar, antzinako kontserba-lantegien arrastoak ezagutuko dira, eta arrantzarekin lotutako lanbideen eta herriko paisaiaren arteko harremanaz hitz egingo da.

Bestalde, karobi eta mendiko labeen ibilbide gidatua izango da urriaren 10ean, 10:00etan eta «Ibiritxo baserria baino lehenago, eskuinaldean dagoen zabalgunean» hasita. Irteera horretan, «iraganeko egitura horien historia ezagutzeko aukera izango da, baita gure paisaian eta baserri-munduan izan duten garrantzia ere».