EAJk Jon Urresti proposatu du Gasteizko alkategai izateko 2027ko udal hauteskundeetan. Araba Buru Batzarrak eta Gasteizko lau batzokiek adostu dute haren izendapena, eta datozen asteetan berretsi beharko da hautagaitza afiliatuek egingo duten barne prozesuan.

59 urte ditu Urrestik, Zientzia Politikoetan eta Soziologian lizentziatu zen Deustuko Unibertsitatean, eta 1993an sortu zuen Gizaker iritzi azterketa eta inkesta enpresa. EAJko militantea da 16 urte zituenetik, baina inoiz ez du kargu publikorik izan. 2016tik Vital Fundazioko presidentea da, eta erakunde horren bidez gizarte, kultura, kirol eta ekonomia arloko hainbat egitasmo bultzatu ditu azken hamarkadan.

EAJk nabarmendu du Urrestik "kudeaketa gaitasun egiaztatua" duela, eta ondo ezagutzen duela Gasteizko errealitatea. Bere agintaldian, Vital Fundazioak parte hartu du Talgo, Basquevolt eta beste hainbat enpresa estrategikotan egindako inbertsioetan, eta Arkabia kultura gunea edo Estadio kirol instalazioen berrikuntza bezalako proiektuak ere sustatu ditu. Alderdiaren esanetan, enpresa eta gizarte eremutik datorren profil baten aldeko apustua egin dute, udal kudeaketara esperientzia hori eramateko.

Urrestiren hautagaitzak forma eman dio dagoeneko 2027ko Gasteizko udal hauteskundeetako lehia politikoari. EH Bilduk Rocio Vitero izango du alkategai, PPk Iñaki Garcia Calvoren alde egin du, eta aurreikusten da Maider Etxebarria egungo alkatea izango dela PSE-EEren hautagaia, nahiz eta alderdiak ez duen oraindik ofizialki baieztatu. Bestalde, Beatriz Artolazabalek, EAJren egungo udal bozeramailea eta aurreko hauteskundeetako hautagai jeltzaleak, udala utziko du eta Madrilen jarraituko du bere ibilbide politikoa, Senatuko ordezkari izendatuko baitute, Estefania Beltran de Herediaren ordez.