– Det skjer mykje satsing på nordområda. Folk har lyst å flytte hit, bu her og ikkje minst bli her. Da treng vi fleire hus.

Det seier Anders Faanes, næringssjef i Finnmark fylkeskommune.

Han forklarer at det er bustadmangel fleire stader i fylket, sjølv om det ikkje bur så mange folk her.

– Ein tenker kanskje at det er mykje hus i Finnmark og lite folk. Men dei folka som har flytta herfrå vil ikkje selje husa sine, men ha dei som fritidsbustader.

Når det ikkje er så mange ledige hus, er neste alternativ å bygge nye. Men i dag kan dette vere ein stor økonomisk risiko, meiner næringssjefen.

– Huset er mindre verdt den augeblinken du flyttar inn enn prisen du har betalt for å bygge det. Dette er ei litt større utfordring i Finnmark enn i resten av landet og noko vi må løyse saman.

Denne veka er Faanes med på ei samling i Lakselv med kommunar, bankar, utbyggarar og grunneigarar, for å finne ut korleis problema rundt bustadmangel kan løysast.

Partane greier blant anna ut ei ordning for lån, tilskot eller garanti for auka bustadbygging saman med Husbanken.

– Vi vil finne løysingar som gjer at dei som tar sjansen og flyttar hit med familien sin og bygger hus, slepp å ta ein for stor risiko, seier Faanes.

Kommunal- og distriktsminister Bjørnar Skjæran (Ap) gir verken eit ja eller nei til om han vil støtte ei slik ordning.

Men han påpeikar at regjeringa har gjort fleire ting for å auke bustadbygginga i heile landet.

– Alle dei grepa vi tar, vil ha noko å seie også i Nord-Noreg, seier Skjæran.

Ministeren peikar blant anna på at 1 milliard kroner er sette av i Husbanken til kommunar i sentralitetsklasse 5 og 6.

Dette gjeld nesten alle kommunane i Finnmark, bortsett frå Alta og Hammerfest.

Regjeringa har også løfta låneramma i Husbanken frå 19 milliardar til 34 milliardar kroner i 2026, seier ministeren.

Næringssjefen i fylkeskommunen seier han vil sjå på kva slags ordningar Finnmark kan få ut av dei satsingane Skjæran trekker fram.

– Vi er på ingen måte ferdige med korleis ordninga kjem til å sjå ut. Vi jobbar med å få redusert risikoen som gjer at folk kan flytte opp hit, seier Faanes.

For å finne ei løysing, er det viktig at alle partane samarbeider, meiner han.

– Eg er veldig opptatt av at vi ikkje skal peike på kvarandre og seie at den eller den har ansvaret, men vi må finne dei beste løysingane saman.