– Eg meiner det er veldig viktig at retten får ei forståing av det praktiske, og korleis det reelt sett er å jobbe her, seier forsvarar Reidar Andresen, som representerer Karlsøybruket.

I dag møtte heile retten i Nord-Troms og Senja tingrett opp på Vannøya i Troms.

Både aktoratet, dommarane, forsvararane, representantar for Karlsøybruket, Fiskeridirektoratet og fire av dei tiltalte deltok på ei planlagd synfaring ute på Karlsøybruket.

Åtte personar står tiltalt for systematisk feilrapportering og organisert kriminalitet i fiskerinæringa, i ei sak der påtalemakta meiner det manglar vegesedlar for fisk til ein verdi av 164 millionar kroner.

I tillegg har Karlsøybruket og tre reiarlag fått millionar i inndragingsførelegg.

Forsvararane understrekar at turen til Vannøya er heilt avgjerande for at retten skal skjøne arbeidsforholda og tempoet på kaia.

Alt frå mottak av fisk, veging, sløying og logistikk på kaia.

– Det er rett og slett for at ein skal få et bilde på korleis dette fungerer i praksis, seier advokat Thomas Hansen, som representerer den eine kaiformannen.

Advokat Andresen meiner rettsforhandlingane må ta utgangspunkt i verkelegheita ute på kaia.

– Praktisk tilnærming er heilt sentralt i botnen, og så får ein ta teori og papir deretter, seier Andresen.

Aktor Tor Børge Nordmo meiner synfaringa er viktig for å unngå spekulering.

– Det er først og fremst for å få sjå reint praktisk korleis det føregår, så ein slepp å spekulere i ting etterpå.

– Det er mykje enklare å sjå det sjølv med eigne auge, seier aktor Tor Børge Nordmo.

Forsvarar Magnhild Meringen peikar på at synfaringa viser både profesjonaliteten og det høge tempoet dei tilsette jobbar under.

I tillegg legg ho ikkje skjul på at den langvarige saka har hatt sin pris for hennar klient.

– Min klient kjenner seg overhovud ikkje igjen i beskrivinga i tiltalen. Etterforskinga har gått føre seg i over tre år, i tillegg til ein så langvarig rettssak.

– Det er frykteleg belastande, både personleg og inntektsmessig, seier Meringen.

Karlsøybruket står tiltalt for omfattande feilrapportering i perioden 2018–2023, der det skal vere underrapportert fisk for nærare 20 millionar kroner. Bedrifta har nekta å godta ei bot på 15 millionar kroner og eit inndragingskrav på 19 millionar kroner.

Saka fortset i tingretten utover hausten, der det totalt er sett av fire månader til forhandlingane. Alle dei tiltalte nektar straffskyld etter tiltalen.