22/08/2026 Actualizado a las 16:18h.

Duela sei urte moto istripuz hil zen Ugaitz Kerejeta futbolariaren oroimenezko partida jokatu dute gaur Lagun Onakek eta Reala C-k Garmendipe futbol zelaian. Etxeko taldea nagusitu da, 2-1.

Partida hasi aurretik, bi taldeetako jokalariak eta Kerejetaren senideak zelai erdian elkartu dira. Bi klubetako ordezkariek, Lagun Onaken eta Realaren izenean, lore sortak eman dizkiete Kerejetaren senideei. Ondoren, minutu bateko isilunea egin dute Kerejetaren eta duela gutxi hil den Ion Gomez Realeko nutrizionistaren omenez.

Lagun Onakek eta Reala C-k denboraldi-aurreko lagunartekoa jokatu dute ondoren. Partidaren lehen zatia parekatua izan da, nahiz eta Lagun Onakek baloiaren jabetza handiagoa izan. 40. minutuan, Imanol Alberdiren erdiraketa baliatu du Jakes Aranbarrik etxekoen lehen gola egiteko, eta 1-0 iritsi dira atsedenaldira.

Bigarren zatian, Lagun Onakek aldea handitu du 57. minutuan. Area kanpotik ateratako falta baten ondoren, Ilias Abouallalek buruz errematatu, gol ederra lortu eta 2-0ekoa jarri du markagailuan. Bestalde, partidaren azken orduerdian, Jose Luis Ribera entrenatzaileak talde osoa aldatu du jokalari gazteei protagonismoa emateko ere. Realak, ordea, aldea murriztu du 77. minutuan, eta azken minutuetan berdinketa lortzeko aukerak ere izan ditu. Azkenean, Lagun Onakek eutsi egin dio abantailari, eta 2-1eko emaitzarekin amaitu da partida.

Horrela, Ugaitz Kerejetaren oroimenezkoa etxean geratu da beste urte batez. Duela sei urte Lagun Onakeko jokalari ohia hil zenetik, klubak urtero antolatzen du abuztuan haren oroimenezko partida.