Тропарь пророка Елисея

глас 4

Во плоти Ангел,/ пророков основание,/ вторый Предтеча пришествия Христова, Илия славный,/ свыше пославый Елиссееви благодать/ недуги отгоняти/ и прокаженныя очищати,// темже и почитающим его точит исцеления.

Ин тропарь пророка Елисея

глас 4

Иже во плоти Ангел/ и пророков начальнику свидетельствова, славный Елисее,/ дивны чудеса соделал еси, пророче,/ поспешеством Святаго Духа;/ силою Илииною исцелив водное естество,/ звери же погуби пожирающия,/ и Неемана очисти,/ и вдовича сына воскресил еси,/ и всем чтущим тя даруй благодать и исцеление.

Кондак пророка Елисея

глас 2

Пророк Божий явился еси,/ сугубую благодать прием,/ воистинну достойную тебе, Елиссее блаженне:/ Илии бо был еси совсельник,// с нимже Христу Богу молися непрестанно о всех нас.

Тропарь святителя Мефодия

глас 4

Правило веры и образ кротости,/ воздержания учителя/ яви тя стаду твоему/ Яже вещей Истина./ Сего ради стяжал еси смирением высокая,/ нищетою богатая,/ святителю Мефодие,/ моли Христа Бога// спастися душам нашим.

Кондак святителя Мефодия

глас 2

На земли подвизался еси, яко безплотный,/ и Небеса наследовал еси, Мефодие,/ яко изъяснивый в концех икон поклонение,/ в трудех бо и болезнех вящше пребыв,/ не престал еси дерзновением,// обличая отметающияся иконы Христовы.

Тропарь преподобного Мефодия, игумена Пешношского

глас 8

Божественною любовию от юности распаляемь,/ вся, яже в мире красная, возненавидев,/ Христа Единаго возлюбил еси,/ и, сего ради в пустыню вселився,/ в ней обитель сотворил еси,/ и, собрав инок множество,/ приял еси от Бога чудес дар, отче Мефодие,/ и был еси о Христе собеседник и спостник преподобному Сергию,/ с нимже у Христа Бога испроси православным христианом здравие, и спасение,/ и душам нашим велию милость.