Medietilsynet førte mot slutten av 2025 tilsyn med 22 produksjonsselskap som produserer program eller seriar for kringkastarar og tilbydarar av audiovisuelle bestillingstenester. Det blei ikkje avdekt brott på reglane i tilsynet.

– Tilsynet viser at produksjonsselskapa har god kjennskap til regelverket, og at dei har etablert og følgjer opp rutinar for å innhente politiattest av tilsette som har regelmessig kontakt med barn og unge, seier Hanne Sekkelsten, direktør for juridisk og regulatorisk avdeling i Medietilsynet.

Det er kringkastingslova som pålegg kringkastarar, tilbydarar av audiovisuelle bestillingstenester og produksjonsselskap å krevje politiattest av medarbeidarar dersom arbeidsoppgåvene inneber regelmessig kontakt med mindreårige. Medietilsynet har altså ansvar for å kontrollere at reglane blir etterlevde.

Tilsynet viser at dei selskapa som har produksjonar der personell har regelmessig kontakt med mindreårige, har rutinar for innhenting av politiattest. Selskap som ikkje har eller planlegg produksjonar med mindreårige, opplyser at dei vil etablere slike rutinar dersom dette endrar seg.

Blant dei selskapa som hadde produksjonar i 2025 der personell hadde regelmessig kontakt med mindreårige, blei det innhenta politiattestar i alle tilfelle. Ingen fekk avslag på søknad om politiattest, og ingen personar blei utelukka frå produksjonar som følgje av opplysningar i attestane.

– Tilsynet viser at bransjen i stor grad tar regelverket på alvor. Det er roande at politiattest er godt innarbeidd som del av arbeidet rundt barn og unge i audiovisuelle produksjonar, seier Sekkelsten.

• Krevst i kringkastingslova av kringkastarar, tilbydarar av audiovisuelle bestillingstenester og produksjonsselskap som har regelmessig kontakt med mindreårige.
• Medietilsynet har ansvar for å føre tilsynet.
• Kontrollen i 2025 omfatta 22 produksjonsselskap.

  Abonner på nyheter (RSS)