– Tromsø kommune nyttar seg av mellombelse butilbod i større grad enn det dei burde gjere.

Det seier fylkeslege i Troms og Finnmark, Anne Grethe Olsen.

Statsforvaltaren har gjort tilsyn av Tromsø kommune sine tilbod av mellombelse bustadar. Konklusjonen er at leiinga i kommunen ikkje har prioritert å få på plass mange nok kommunale bustadar for vanskelegstilte.

Det same tilsynet avdekka også fleire lovbrot i saksbehandlinga hos både kommunen og hos Nav.

Fylkeslegen meiner det spesielt er utfordringar i saker der barn og unge er involvert. Det er problematisk, meiner ho.

– Folk bur der lenger enn tre månadar og det er ikkje ein god nok plan for kva som skal skje vidare.

– Er det alvorleg?

– Når det gjeld barn og ungdom, så er lova absolutt på at dei tre månadane ikkje skal overskridast. I Tromsø kommune har ein jo gjort det, så det er alvorleg.

Kommunen har ein plikt til å hjelpe folk med tak over hovudet i akutte situasjonar. Dette gjer dei saman med Nav.

Geir Jakobsen leiar Nav i Tromsø. Han seier situasjonen og lovbrota er krevjande.

– Dette er det nærmaste vi kjem at Nav har ein AMK-funksjon. For vi har korte fristar på å hjelpe dei som treng hjelp. Vi skal gje dei tak over hovudet allereie same dagen. Og det er ei ganske krevjande øving i ein marknad som har så lite bustadar tilgjengeleg.

Statsforvaltaren meiner Nav gjer vedtak om mellombels butilbod for seint. Dette skal normalt sett gjerast før folk flyttar inn, men i ein del tilfelle har dette blitt gjort etter innflytting.

Nav-leiaren meiner dei har vore i ein skvis: Dei må velje mellom å følgje lova til punkt og prikke eller å få folk inn i bustadar raskt nok.

– I den situasjonen vi har hatt no, kor det har vore stor pågang etter mellombels bustad, så har vi vore nøydd til å gjere nokre vanskelege prioriteringar.

Han utdjupar:

– Vi har sørgja for at folk har fått tak over hovudet allereie same dag. Det har også resultert i dette lovbrotet på saksbehandlinga i desse sakene.

Oppfølginga av folk for å hjelpe dei inn i ein meir permanent bustad har også vore for dårleg.

Fylkeslege Anne Grethe Olsen understrekar alvoret og ber dei involverte vere obs på fleire ting.

Vurderingane har heller ikkje kome fram i vedtaka, og klageretten har heller ikkje vore reell.

– Det svekker jo rettstryggleiken at ein ikkje følgjer det lovkravet. Det skal stå i vedtaka kva du har rett på, og det gjer ikkje nødvendigvis det heller.

Tromsø kommune har no fått frist på seg til å kome opp med ein plan ved utgangen av juni, og alle lovbrot må ryddast opp i innan utgangen av året.

Per Angermo er direktør for helse og omsorg i Tromsø kommune, og seier kommunen er godt i gang med å rydde opp.

Vedtak i kommunestyret har gjort at dei får fleire bustadar ut i marknaden. Nyleg har dei også fått overført 7 millionar kroner frå Nav Tromsø til Tromsøbolig KF for å leige fleire bustadar.

– Vi sett ned innsatsgrupper beståande av Tromsø kommune, Nav, Tromsøbolig KF og Husbanken, for å få løyst denne floka på kort og på lang sikt, og forhåpentlegvis permanent, seier Angermo.