Atzo, martitzena, elkartu zen udalbatza, eta hartutako erabakien artean izan zen egonaldi turistikoaren gaineko zerga. "Derrigorrezkoa den zerga berri bat da, eta esparru orokorra ezartzen duen ordenantza zirriborroa bidali du Aldundiak, non gehiengo eta gutxiengo kopuru batzuk markatzen diren", azaldu zuen Ibon Unzetabarrenetxea alkateak. "Ogasun batzordean adostu dugu orokorrean gutxiengo kopurua aplikatzea, eta salbuespena izatea etxebizitza turistikoen kategoria. Kasu horretan, kopuru handiena aplikatzearen alde egiten dugu, ulertzen baitugu etxebizitzak ez direla alokairu turistikorako, baizik eta bizitzeko". 

Jeltzaleen babesarekin egin zuen aurrera proposamenak. "Zerga berria da, eta ondo ikusten dugu egindako proposamena. 1.100 pertsona inguruko biztanleriarekin, 48 ostatu plazako eskaintzarekin eta batez beste bi eguneko egonaldiarekin Debagoienean, Elgetako jarduera turistikoak mugatua izaten jarraitzen du, eta tokiko ekonomiarentzat osagarria da; batez ere, familia ostatu txikientzat eta nekazaritza-turismoentzat. Ez dugu uste zergak Elgetan eragin handia izan dezakeenik, baina ikusi egin beharko da ze eboluzio duen", adierazi zuten jeltzaleek.

Uste dute tresna fiskal berriak udal baliabideak indartzeko balio behar duela, baina "sektorearen garapena kaltetu gabe". Hala, "aldizka berrikustearen alde" dago oposizioa.

Zerga berria urtarriletik aurrera aplikatuko diete ostalaritza establezimenduetan gaua pasatzera etortzen diren bisitariei. Zenbatekoa ostatuaren kategoriaren araberakoa izango da. –kopuruak beheko taulan–

"Turistek ordainduko diote establezimenduari, eta horiek hiru hilabetean behin egin beharko dute likidazioa Udalean, BEZarekin egiten duten moduan", azaldu zuen osoko bilkuran udal idazkari Gotzon Goikoetxeak.

Udalbatzak hasierako onarpena eman dio ordenantzari. Erreklamaziorik eta alegaziorik aurkezten ez bada, behin betiko onartuta geldituko da.

Osoko bilkuran, bestalde, Debagoieneko Mankomunitateak energia trantsizioaren norabidea adosteko abiarazitako Argitzen deliberazio prozesuko mandatu organoak hartutako konpromisoak onartu ditu Elgetako Udalak.

Hamaika gomendio dira eta energia kontsumoa murriztera eta berriztagarriak garatzera daude bideratuta. Informazioa gehiago hemen.

1. Establezimendu turistikoak
   • • Hotela 5 izarrekoak edo kategoria baliokidea     4,50
     • Hotela 4 izarrekoak edo kategoria baliokideak   3,50
     • Hotela 3 izarrekoak edo kategoria baliokideak   1,50
     • Hotela 2 izarrekoak edo kategoria baliokideak   1,00
     • Hotela 1 izarrekoak edo kategoria baliokideak   0,75
     • Pentsioak                                                                     0,75
     • Apartamentu turistikoak                                          1,50
     • Kanpinak eta kanpatzeko beste modalitateak      0,75
     • Nekazaritza-turismoak                                             0,50
     • Landetxeak                                                                  0,75
     • Aterpetxeak                                                                 0,75
     • Turismoko beste ostatu establezimendu batzuk 1,50

2. Erabilera turistikoko etxebizitzak
   1. 1. Osorik alokatuak                                                          6,50
      2. Logelaka alokatuak                                                      6,50