Asteburu honetan, urriaren 3an eta 4an, bizikleta irteera egingo dute, Vasco-Navarro bide berdea ezagutuz, Ugutz Basauriren eskutik. Zapatuan, urriak 3, Eskoriatzako tren geltokitik Arrasateko geltokira arteko ibilbidea izango da eta domekan, berriz, Antzuolako kaxetatik Osintxura arteko ibilbidea. 

Horrekin batera, urriaren 24an eta 25ean bisita gidatuak egingo dituzte, Vasco-Navarro bide berdea ezagutzen jarraitzeko. Lehen egunean, Bergarako Labegaraietako zatia aztertuko dute eta bigarrenean, aldiz, Arrasatekoa. Aipaturiko irteera guztiak 11:00etan hasiko dituzte eta bi orduko iraupena izatea aurreikusten dute. 

Era berean, GR-289 Hartzaren Urratsa ibilbidea egiteko aukera ere eskainiko du Mankomunitateak, Oxel Arrieta Menditxik gidariaren eskutik. Hala, urriaren 10ean Araotz eta Oñati arteko etapa egingo dute; urriaren 11n, Oñati eta Bergara artekoa; urriaren 12an, Bergara eta Arrasate lotzen dituen etapa; urriaren 17an, Arrasate eta Leintz Gatzaga artekoa; eta urriaren 18an, Leintz Gatzaga eta Araotz artekoa. 

Irteera guztiak 08:30ean izango dira eta aipatzekoa da autobusa egongo dela irteera puntura joateko –informazioa izena ematerakoan helaraziko dute–.

Hain zuzen, irteera guztietan parte hartzeko, izena eman beharko da, eta bi bide daude horretarako: 943 79 64 63 telefono zenbakira deituta edota infoturismo@debagoiena.eus helbidera idatzita.