Lizarraldek azaldu duenez, zerbitzuak "ibilbide luzea du herrian eta errotuta dago", baina "proiektu guztiek behar izaten dute berrantolaketa eta eguneraketa, eta ludoteka heziketa gune egokia izan dadin familien parte hartzea eta zuzeneko harremana funtsezkoa da". Esan du ate irekien ostean ere familien ahotsa entzuten jarraitzea dela Udalaren asmoa, "ikasturteko plangintza aberasteko". Online galdetegi baten bidez egin daitezke ekarpenak.

Udalak, bestalde, astelehenean irekiko du gazteleku zerbitzurako izen-ematea. Aste bukaeretako zerbitzua izango da eta 2011tik 2014ra jaiotakoendako. Programazioa egiteko gazteekin egindako bilera positiboa izan zela azaldu du Lizarraldek. Esan du, dena den, zerbitzua martxan jartzeko erabiltzaile gehiago beharko direla.