Ordiziako feriak inauguratu du uztaila, hileko lehen egunean bertan gainera. Aurreko astekoarekin alderatuta, freskoagoa izan zen asteazkenekoa, baita biziagoa ere, bisitari eta erosleei dagokienez, eta berritasunen tala ere bai.

Eta berritasun horien artean, berenjena izan zen nagusia. Zeraingo Mendarte baserriko Iñaki Intxaustik zituen salgai urteko lehenak, kiloa 4,5 euroan. Negutegikoak ziren, baina ekologikoak, bere postuan saltzen dituen barazki guztiak bezala.

Ekologikoak ziren, baita ere, eguneko beste produktu berriak, kuiatxo zuriak. Mendarteren ondoko postuan zituen salgai Bidanian Sustrai Askeak izenarekin ekoizten duen Natalia Magallanesek, 3, 2 euroan kiloa. Horiek aire librekoak ziren. Magallanesek, bestalde, badu atal berezi bat postuan, kontserbei eskainitakoa. Neguan Bidanian hazitako barazki eta fruituekin egiten ditu, eta aukera zabala du: kuiatxo eta kuia pureak ditu (3,8 eurotik 6 eurora, potearen tamainaren arabera), tomate frijitua (4,2 euroan), baita kuia, kuia eta sagarra eta tomate berde marmeladak ere (3,8 euroan).

Berritasun gehiago ere aurkeztu zituzten asteazkenean. Azken asteetan iritsitako piperren eskaintza zabaltzera, piper italiarra eta piper berde ezti luzea jarri zituen salgai Aramako Patxi Arizmendik, lehena 4,5 euroan kiloa eta bigarrena 8,5 euroan. Bestalde, Zurutuza ahizpek aire libreko pipermina eta Gernika jarri zituzten salgai, eta horiek ere berritasun izan ziren, orain artekoak negutegikoak baitziren.

Bestetik, tomatea ere aipatu behar da, geroz eta ugariagoa delako. Postu askotan dago salgai dagoeneko, kiloa 4 eta 6 euro artean. Asteazkenean, ekologikoa iritsi zen, Zeraingo Intxaustirena, eta Gabiriako Jose Antonio Elosegirena. Azken honek, herriko bertako Altzibar baserrikoa zuen, San Joan sagarrekin batera.

Fruta berri bat ere iritsi zen, aran gorria. Maria Jesus Oriak aurkeztu zuen, gorri iluna, eta kiloa 3 euroan eskaini zuen.

Sortak egiteko loreen eskaintza ere ugaritzen doa astetik astera, eta asteazkenean, Aramako Miren Jauregiren gladiolo koloretsuekin batera, Zurutuzatarrek agapanthus urdinak ziren nabarmenenak. Lore sorta 5 euroan dute salgai bi postuetan.

Perretxikoen eskaintza, aldiz, nabarmen gutxitu da azken ferietan. Barcinaren eta Lsaren postuen artean 45 kilo onddo (kiloa 15 eta 35 euro artean) eta sei kilo ziza hori (15-25 euro artean) besterik ez zituzten eskaini.