Mearrádus lea sámediggeráđi árvalusa mielde.

Kent Valio virgáduvvo direktevran Sámediggái áigodahkii 01.11.2026–31.10.2032 ja su váldobargobáiki lea Sámedikki hálddahus Kárášjogas.

Sámediggepresideanta Silje Karine Muotka (NSR) lea duhtavaš virgádemiin.

– Sus lea nanu jođihanhárjáneapmi almmolaš ja politihkalaččat stivrejuvvon doaimmain, ja dovdá bures sámi servodaga. Dat addá buori vuođu jođihit hálddahusa mas lea alla gelbbolašvuohta ja stuora áŋgiruššan min servodatdoibmii, dadjá Muotka.

Čieža olbmo ohce Sámedikki direktevravirggi ja ovddit direktevra Inger Marit Eira-Åhrén lei virggis ovtta mearreáigeáigodaga.

– Anán árvvus go ožžon dán virggi, ja illudan veahkkin eará bargiide Sámedikkis
bálvalit olles politihkalaš dási, dadjá Kent Valio preassadieđáhusas.

Valio muitala ahte váldá badjelasas jođiheaddjibarggu vuollegašvuođain.

– Mu vuosttaš bargun šaddá lohkat ja gullat buot politihkalaš diŋgojumiid ja bargiid cavgilemiid, dadjá son.

Rekrutterenfitnodat Heia Nord-Norge lea veahkehan Sámedikki
rekrutterenproseassa bokte.

Ovddalgihtii ledje muhtin láhttut virgáibidjanlávdegottis gáibidan eambbo dieđuid rekrutterenfitnodaga árvvoštallamiidda.

Lei liikká ovttajienalaš lávdegoddi mii odne virgádii Valio.

– Lávdegottis ledje loahppavuorus guokte buori ohcci, ja mii leat vuođđudan min mearrádusa gelbbolašvuođaprinsihppii. Lávdegoddi lea ovttajienalaččat mearridan fállat
Kent Valioi mearreáigevirggi Sámedikki direktevran, dadjá Anne Henriette Nilut, gii lea virgáibidjanlávdegotti jođiheaddji ja sámediggeáirras.

Kent Valio lea bargan sadjásaš doaimmahushoavdan NRK Sámi ođasdoaimmahusas mannan cuoŋománu rádjai.