– Det er ei stor ære å bli attvald til dette viktige vervet, og eg ser veldig fram til å fortsette arbeidet vi er i gang med i Science Europe, seier Sundli Tveit.

Ho understrekar at Europa og verda står overfor store utfordringar: geopolitisk uvisse, aukande global konkurranse, teknologiske og samfunnsmessige omveltingar, klima- og naturkrise og aukande forskjellar.

– Skal vi møte desse utfordringane, krev det framifrå forsking og auka innsats frå forskningsfinansiørar og forskingsutførande organisasjonar. Vi må forstå utfordringane betre og bidra til løysingar og kunnskapsbaserte avgjerder. Her speler Science Europe ei strategisk og forskingspolitisk nøkkelrolle, seier ho.

Attvalet av Sundli Tveit som president fann stad på Science Europes generalforsamling i Oslo i dag. Leiarar frå forskingsorganisasjonar over heile Europa er samla i Oslo til generalforsamlinga og ein workshop om “Research Collaboration, Competition, Valorisation, and Protection in an ERA of Uncertainty.”

Sundli Tveit trekkjer fram fleire prosessar der Science Europe vil ha ei sentral rolle:

• Forhandlingane om EUs 10. rammeprogram for forsking og innovasjon, som vil definere Europas forskingspolitikk for det neste tiåret.
• Utviklinga av European Competitiveness Fund (ECF) og samspelet mellom ECF og Horisont Europa.
• Å sikre balansen mellom openheit og tryggleik i internasjonalt forskingssamarbeid.
• Å forsvare akademisk fridom, framme beste praksis og styrkje posisjonen på forskinga i samfunnet.

– Science Europe skal vere ei plattform for samarbeid og kunnskapsdeling, og bidra til at forsking held fram med å vere eit globalt fellesgode. Saman kan vi sikre at vitskapen held fram med å vere ei drivkraft for innovasjon og ei kraft for det gode, seier Sundli Tveit.