27/03/2026 a las 13:07h.

Alo llargo del últimu mediu sieglu la nuestra llingua espresárase na lliteratura, na música, el teatru, el cine, nos medios de comunicación y en toa clase de publicaciones periódiques. El Muséu del Pueblu d'Asturies espón dende'l pasáu miércoles y hasta'l mes d'ochobre una interesante amuesa del usu del asturianu na cartelería, al traviés d'una cincuentena d'obres gráfiques esbillaes de les cerca de dos mil que la Fundación Belenos donara al Muséu en 2023 y qu'algamen estremaes temátiques: dende la mesma reinvindicación llingüística a l'anuncia d'eventos culturales, l'ecoloxismu o la política. Son, en palabres del director del Pueblu d'Asturies, Juaco López: «Un testimoniu imprescindible pa conocer el movimientu de reivindicación de la llingua asturiana, que surde na transición» y al empar, una curiosa representación «d'arte efímeru», o como afirmó la conceyala de Cultura de Xixón, na so inauguración: «Fiel reflexu d'una sociedá comprometida cola so llingua y la so cultura».

La selección de cartelos que se puede ver agora convida a un viaxe pela memoria del movimientu asturianista con exemplares como los qu'anuncien la primer celebración del 25 de Mayu o la primer manifestación pola oficialidá de la Xunta pola Defensa de la Llingua. Tamién cartelos singulares como los estampaos pol colectivu sacerdotal Manuel Fernández de Castro y en concreto el que presenta una imaxe de la Santina cola llienda: 'Rezáime n'asturianu'. Un sitiu destacáu acútase al ya icónicu cartelu del besu que convida a usar la llingua, tamién de la Xunta. Y una bona cuenta d'ellos fai crónica del espoxigue de la mùsica celta y de los diversos festivales entamaos alrodiu d'ella. El Día de les Lletres apaez d'igualmiente espeyáu en delles de les pieces .

L' autonomismu, la ecoloxía o la llucha llaboral apaecen tamién reflexaos nuna amuesa que val pa siguir arriendes les distintes estétiques del cartelismu y les aportaciones d'artistes como Ástur Paredes, Ánxel Nava o Mª Xosé Rodríguez, amás del 'robáu' de Picasso nel célebre cartelu de la so llámpara minera cola llienda: 'Asturies allumael to camín'. La mayoridá de les pieces donaes por Belenos abellugárales el so miembru Ignaciu Llope, qu'animó na inauguración a qu'otres colecciones particulares se cedan al Muséu. El conxuntu donáu puede consultase n'internet enfondos.gijon.es, íntegramente.