15/05/2026 Actualizado a las 18:51h.

El volume conmemorativu de la pasada Selmana de les Lletres Asturianes: 'De viva voz. Taresa Cónsul y el teatru asturianu' ufre una docena de trabayos d'otros tantos autores, nos que s'analicen estremaos aspectos de la figura y el contestu históricu de la monxa Taresa Escolástica Cónsul, autora del segundu entremés conocíu de la nuestra lliteratura asturiana y el so venceyu col teatru popular d'Asturies. Y lloñe del so calter netamente celebrativu el so interés ta na oportunidá que brinden los distintos especialistes axuntaos nestes páxines pa proyectar lluz nel sentíu de la obrina que se conserva d'esta escritora y del periodu, tan bayurosu d'estudiar, nel que s'escribió, asina como l'escenariu familiar de la propia autora y les sos interrellaciones col grupu intelectual que cultivó la lliteratura en llingua asturiana y la tresmitió na circulación de copies manuscrites qu'acabaron llegando a los nuestros díes. Tamién se contestualiza con rigor y tinu igual d'afayadizos el sitiu de la obra de Cónsul nel marcu xeneral de la illustración hispánica de la que foi contemporánea. Y ufiértase el testu del entremés de la mano del autor que lu editó la primer vez: Álvaro Arias. Xunta'l so nome los d'otros especialistes comoPatricia Suárez Álvarez, qu'analiza la sociedá de la so dómina; Andrés Martínez Vega, que fai lo propio col horizón socio-cultural de la monxa escritora; Guillermo Fernández Ortiz, qu'aborda el cleru regular femenín del sieglu,XVIII; Elena de Lorenzo, qu'estudia el so entremés; o Patricia Suárez Álvarez, que plantega la modernidá del suxetu y Taresa Cónsul. Xunta ellos, Sergio Buelga, Eva Vallines, Alain J. Fernández o Carlos Alba abren l'ángulu al teatru popular asturianu, mientres la escritora Pilar Sánchez Vicente remata'l volume con un prestosu testu lliterariu pa da-y voz a la nuestra primera autora dramática. Un llibru imprescindible.