19/12/2025 a las 10:01h.

Tán equí ya, a la vuelta d'unos díes eses fiestes nes que nunca sabemos qué regalar a la xente más querío. Dende Alitar aidámoslos a acertar na so escoyeta cola fórmula infalible d'un discu o un llibru nes nuestres llingües propies. Hai asgaya onde elexir y malo va ser que nun atopen ente ello dalgo curioso y del gustu de la persona a la que va empobinao. Ente toa esa bayura, úfrimos-yos a los nuestros llectores diez posibles propuestes que de xuro nun los van dexar mal.

Empezamos polo más difícil d'escoyer, cinco llibros de metanes tolos que fueron viendo la lluz a lo llargo d'esti añu qu'agora fina.Y proponemos un clásicu de la lliteratura universal aptu pa xente de cualaquier edá : 'Aventures d'Alicia nel país de les maravíes'(Impronta) de Lewis Carroll, en versión asturiana de Xilberto Llano, qu'agora se reedita después de tar escosada la primer impresión nel nuestru idioma. Xunta él, inda cola tinta fresco, otra obra de la biblioteca de Babel y del nuestru tiempu, la recién traducción de 'Eva'(Trabe) de l'autora griega Ersi Sotiropoulos, que nos enverda a los baxos fondos d'Atenes al través de la mirada d'una muyer y que torna al asturianu Dani Menéndez, dientro la collección Calume.

De la narrativa autóctona, una novela de xéneru que puede prestar abondo, tanto como dar un poco de respigu: 'La cuna vacía'(Radagast) de la llangreana Ana Pereira. Y tamién l'últimu títulu de Cristóbal Ruitiña: 'El asesino de Sargadelos' (Impronta), una magnífica narración histórica sobre la figura del illustráu Antonio Raimundo Ibáñez. Pa rematar, una obra bien afayadiza pa familarizase col usu de la nuestra llingua: 'Gramática d'asturianu. Guía de consulta rápida'(Trabe) de la escritora y filóloga Esther Prieto, que ya va pela segunda edición.

Nun sabemos si abulta dalgo más fácil, encamentar discos, pol aquello de la precariedá na que, por desgracia, siguen a difundir el so trabayu los músicos y músiques n'asturianu. De la calidá y diversidá de la so creacón, dende llueu, nun hai nenguna duulda. Bon exemplu ye'l triple álbum de Rubén Bada: 'Cantares, vigulín, guitarra', una auténtica obra maestra en tres discos d'un de los nuestros meyores artistes. Otru nome clave de la nuestra escena, la mítica banda Los Berrones, acaba de sacar del fornu la so nueva xenialidá: 'Ta too podre'(Ataque!), bona amuesa de que la vena creativa y el dominiu del so sellu musical propiu siguen en perfectu estáu de gracia pal grupu de Ramón Blanco y Olegario Méndez. Y dos exemplos de qu'hai relevu xeneracional y de que nun-y falta talentu nin enerxía: 'La rabia nos dientes' d'Ochobre, punk rock frescu y enllenu d'autenticidá, y 'Memories de Deva', de Guieldu, una banda moza que remanez el folk con sangre nuevo. El regalu final, el discu-llibru 'Pop Piquiñín', los temazos de Petit Pop en llingua asturiana. Busquen ustedes más.