26/06/2026 a las 10:59h.

Cantante y frontman del grupu Dixebra, Xune Elipe Raposo (Avilés, 1962) tien analizao la escena musical n'asturianu n'obres como 'Llingua y rock' (1996), 'Rockmería. Un repasu a la música popular del sieglu XX'(2009) o 'Hai una llinia trazada. Historia de la música asturiana' (Premiu Fuertes Acebedo d'Ensayu, 2022). Agora publica'l volume 'Da-yos caña. El tiempu y el contestu d'una banda de Rock Astur', sobre la formación musical que lidera dende los sos anicios hasta güei y que-y valió el Premiu 'Yolanda Huergo'. Esti miércoles 24 presentábase nel café llibrería Toma 3 de Xixón de la mano del escritor y periodista Paco Álvarez.

Alrodiu del conteníu d'esti trabayu, el músicu y activista desplica a esti diariu que «ye y nun ye la historia de Dixebra. Val por dicir, lo que fice ye garrar a Dixebra como una 'disculpa' pa falar d'otres coses. Digamos que lo utilizo como catalizador para falar de les circunstancies, socedíos y fechos más importantes qu'incidieron na creación y na historia de la banda. Por exemplu, hai una última parte que ta centrada en Dixebra, que ye como tolo anterior de lo que falé, tien reflexu tanto nes lletres como na ideoloxía del grupu».Nesi sen apunta que nel llibru «escomienzo falando de la crisis del petróleu nos 70, que ye dalgo qu'influye posteriormente ya cuando muerre Flanco n'Asturies cola entrada de la reconversión industrial, y tola problemática llaboral, los miles de despidios que tuvimos ente dellos sectores, la llegada del paru y la droga, etc.. Como too eso, la llegada de la democracia formal, l'establecimientu del Estáu de las autonomíes, el surdimientu del asturianismu contemporáneu, va tener un reflexu en Dixebra, nuna filosofía propia y mesmo nel surdimientu de la banda. O la llegada del punk a principios de los 80. Como todo ello va a ser determinante pa que cinco rapazos de barrios obreros d'Avilés, lleguemos a xuntanos y montar una banda como de Dixebra. Nel llibru cuento como hai tantos movimientos o escenes musicales que nun son a entendese completamente si nun conoces tolo que los arrodia, l'ambiente nel que se crearon movimientos dende'l blues, al nueu canciu o el rock radical vascu. Nun podemos falar solo de música pa entender el fenómenu musical concretu», desplica.

Pa Elipe, quiciabes el llogru más relevante qu'algamó la banda avilesina foi el de «crear comunidá, trescender el fechu netamente musical pa crear sinerxes y conexones con distintos movimientos sociales. Ye dalgo que siempre tuvimos claro, había que crear comunidá n'Asturies alrededor del país, les llingües y la cultura propia. Esi foi el llabor que nós quiximos facer al traviés de los nuestros cantares. De mano yera too más urxente ya inmediato, después gracies a les collaboraciones d'escritores como Paco Álvarez, Quique Faes, Xandru Fernández y otros algamamos lletres más reflexives y con un componente lliterariu».

No propiamente musical, también considera Elipe que «llogramos esbarrumbar munchos prexuicios y ser tresversales». Un camín que la banda sigue calteniendo nel presente y más énte un futuru nel que se albridren «tiempos gafos, nun sabemos si tanto o más de los que vivimos de la qu'entamó Dixebra y esi papel de denuncia crítica sigue dándonos tol sentíu pa siguir», afirma.