06/02/2026 a las 16:37h.

El músicu Maxi Areñes va llanzar güei en toles plataformes dixitales el nuevu discu del so proyectu Fontoria. Tituláu 'Madremar'y grabáu, como ye davezu, nel estudiu de la so casa n'Areñes (Piloña),l'álbum presenta dos temes instrumentales (ún de 50 minutos y otru de 8) pa pesllase con un cantar 'Nauta', que ya adelantrara'l compositor apocayá.

Dende'l so abellugu piloñetu, Areñes desplica que l'orixen d'esti trabayu tuvo «nuna idea que me rondaba na mente enantes de pensar en grabar nada y yera la de la mar, que pa mí siempre fue femenina, como madre, una madre que te da coses bones pero que tamién puede ser una madre terrible, que castiga». La forma musical foi surdiendo, de la manera qu'asegura «suele ser la corriente en mín, esa paranoia que tenía na cabeza y una melodía qu'empezaba acechame. A partir d'ehí grábola y empiezo a construir lo demás. Nesti casu esa melodía fue creciendo y creciendo, y salió esa suite instrumental de 50 minutos qu'abre'l discu».

El musicu revela qu'a mitá de la pieza escomenzó a tener mui presente l'alcordanza de la Odisea y que féxose tan fonda esa referencia que tuvo a puntu de tilulalo como'l poema homéricu. El viaxe d'Ulises diba remanecer a la fin nel únicu tema vocal del álbum:'Nauta'. Nél,Areñes apunta que «de mano nun cuntaba meter esa pieza cantada. Vieno casi por necesidá. Ye un Ulises vieyu,el que fala, un paisanu que fai balance de los aciertos y los fallos, les aventures, y que ya lo único que quier ye soñar con Ítaca, y descansar, descansar tranquilu, sin nada, sin dolor, sin nada.Simplemente tar onde él quier tar y sin ni siquier que recuerden quién fue ».

Col otru instrumental, el creador de Fontoria quier pone-y el pieslle a la triloxía 'Eolo', qu'empezó nel so discu 'Goetia' pa siguir en 'El neñu que contó toles estrelles', colos qu'enllaza pa zarrar el círculu.

De dar remate a otru círculu, fala tamién Maxi Areñes, ún de los compositores y instrumentistes más insobornablemente orixinales de la escena asturiana, y ye'l del propiu proyectu Fontoria, al que allampia poner fin con otros dos álbumes más. «L'añu que vien cúmplense diez desque entamé Fontoria y parezme que diez años ta bien ya. El primer discu salió en 2019 y al final queden otros ocho discos. Parezme una contribución ya bastante curiosa y sin pretensiones, porque nun tamos nun país pa les pretensiones. Bono, la xente ya sabe cómo pienso y ,en fin, yo dalgo ya apurrí, dalgo bastante». Xunta esos dos nuevos discos, el músicu confiesa que tamién-y prestaba grabar un segundu trabayu con Nuramay, el proyectu paralelu que caltién cola so compañera Maitetxu Isla.

Mentantu llega esi pieslle de ciclu, la xente que sigue'l trabayu d'Areñes tien agora ocasión de disfrutar como merez el recién llanzáu Madremar, nel que'l músicu toca más d'una treintena d'instrumentos y nel que cuenta coles collaboraciones de Pablo Canalís, Olivier Grenoble, Mael Martínez y a los coros, Maitetxu Isla. «Hai teclaos, dellos antigüos, de los años 60 y 60, guitarres, baxos, marimbes, flautes, hasta un saxo, qu'enxamás metí y ente los instrumentos más raros que suenen, meto hasta un cepillu de dientes. Como me presta dicir, faigo la música que me apetez a mí y si a dalquién más-y gusta, fantástico» .