06/02/2026 Actualizado a las 11:03h.

El salón d'actos del Antigu Institutu acueye mañana (12 hores) un homenaxe al escritor Xuan Bello entamáu pol Atenéu Obreru de Xixón. L'actu va cuntar cola presencia institucional de la conseyera de Cultura, Vanessa Gutiérrez, la conceyala de Cultura y Educación del Ayuntamientu de Xixón, Montserrat López Moro, y el vicepresidente de l'Academia de la Llingua Asturiana, David Guardado. Embaxo'l títulu 'N'alcordanza de Xuan Bello. A la sombra d'una crezal', la entidá ateneísta va xuntar nuna mesa redonda a la filóloga Marta López, la periodista Beatriz R. Viado y al escritor Milio Rodríguez Cueto, los tres amigos del inolvidable autor de Paniceiros y collaborador d'esti diariu. De siguío, los sos versos volverán sentise nes voces d'otros compañeros y compañeres de camín como Miguel Rojo, Carlos Espina, Lourdes Álvarez, Marta Mori, Pablo A. Marín Estrada, Esther Prieto, Antón García o Xuan Santori. Y a elles van sumase otres en forma de mensaxes audiovisuales con testimonios y testos propios, ente ellos, el poeta Martín López Vega o el cineasta Ramón Lluis Bande. Palabres cercanes y sentíes pa caltener viva la memoria, y sobremanera la so obra, del más universal de los nuestros escritores.