27/02/2026 a las 14:30h.

L'escritor y académicu de la Llingua Xandro Martino Ruz (Ribesella, 1966) algamaba en 2024 el Premiu de Testos Teatrales Pachín de Melás de la Conseyería de Cultura cola so obra 'Subpayaria', publicada posteriormente pol sellu Trabe. Agora, mientres se solventa la manera de llevala a escena. ún de los propósitos del gallardón, el so autor fálanos d'esta comedia d'enriedu que parte de la tradición costumista asturiana pa superala dende una perspectiva acordies al presente y qu'a xuiciu del xuráu que la valoró, fai «crítica social del grandonismu astur y d'otros non menos tóxicos».

Martino aclaria y matiza esta llectura afirmando que «cuando empecé a escribir y cuando acabé la obra, enxamás pensé que fuera una crítica al grandonismu asturianu. Lo que sí quixe facer, yera una comedia, sobre el grandonismu asturianu y confrontalo, ye verdá, con otros grandonismos. Pero agora, pasáu'l tiempu, veo la frase del xuráu, y sí que tien sentíu, magar yo en nengún momentu pretendía facer, digamos, un estudiu sobre grandonismos, nel nuestru país contra otros. Más que crítica, quería facer comedia alredor d'ello».

En cuantes al usu de la tradición costumista, l'escritor riosellán revela que'l testu «nació como guion de cine y después quixe reformulalo como obra de teatru. Una vez que decidí eso, la primer premisa yera que'l mesmu testu mandábase a ser una comedia costumista pero ensin caer nos tópicos, nin nos estereotipos. Porque yo almiro munchísimo esi teatru, qu'amás siempre gozó d'una popularidá y una salú tremendes, pero munches obres de los autores d'enantes tan enllenes d'esteorotipos y de diglosia, onde los personaxes más bobos y menos estudiaos falen asturianu y los que representen a les autoridaes o a otru estatus social, falen castellán. Yo tenía claro que si facía costumismu había ser modernu, que se pudiere consumir ensin que te rinche'l celebru al velo», asegura.

El xuráu del premiu tamién resaltara nel so día'l llinguaxe averáu a la oralidá del testu de Martino, dalgo sobre lo que l'autor apunta: «Cuando escribo noveles emplego un rexistru lliterariu altu, pero nesti casu el procuru ye que pueda llegar al públicu y la manera de llogralo ye con un asturianu que pueda sentise na cai en cualaquier momentu. Rebaxo'l tonu cultu del rexistru con esi enfotu». Y polo que toca al propiu títulu y ún de los asuntos centrales de la comedia, l'escritor señala que «siempre me llamó l'atención y me fizo gracia eso de Subpayaria y subpayarianos (en paralelismu a los subsaharianos) pa referise a la xente que vien del sur de Payares. En nengún momentu se fala d'una comunidá en concreto y ye en tou casu una historia de ficción. Si dalguién se siente aludíu ye problema suyu. Equí los subpayarianos vendríen a ser l'equivalente a lo qu'en Galicia tán llamando 'fodechinchos', xente que llega con una actitú faltona, de superioridá y poco respetu tentando dicite a ti lo que tienes de facer. Pero tamién dellos de los personaxes principales tán inspiraos nel mundu del asturianismu, mesmo dellos que lleeron la obra punxeron nome a más d'ún». De cualquier manera la clave del testu de Martino ye l'humor y nella tien de lleese, recalca'l so autor, qu'acaba de rematar una novela y trabaya nun guion de cine nuevu, que nesti casu sí-y prestaba ver materializáu como talu.

Nun futuru prósimu allampia por ver puesta nun escenariu esta comedia moderna: 'Subpayaria'.