20/03/2026 a las 10:00h.

Pelayo Martínez Olái (Llangréu, 1997) ye ún de los pocos autores en llingua asturiana que tien fecho del cuentu breve el so territoriu especializáu d'escritura. Graduáu en Llingües Modernes y les sos Lliteratures pola Universidá d'Uviéu, y docente anguañu nel IES Cangasdel Narcea, tien algamao colos sos relatos dellos concursos lliterarios y apocayá publicaba col sellu Cuatro Gotes el so primer llibru: 'Fuxir', 52 narraciones, averaes a la forma del microrrelatu qu'amuesen una voz tan personal como les hestories que condensa nes sos páxines.

Dende Sama, la villa na que nació y vive, l'escritor desvela que «lo que fice, depués d'un bloquéu lliterariu nel que tuvi, foi marcame'l retu d'entamar un relatu cada selmana del añu. El resultáu foi esti llibru». En cuantes al formatu escoyíu asegura que «el cuentu curtiu ye un xéneru que siempre me prestó y paecióme bien afayadizu pa cumplir con aquel retu nel qu'escomencé en 2022, acabantes de salir de la pandemia». El títulu puede venceyase a esi dexar atrás l'andanciu del Covid, pero tamién a «fuxir de la realidá al traviés de la lliteratura, anque puede entendese de munches otres maneres y aparez nunos cuantos rellatos, pero «la razón qu'esplica estes fueyes ye tan personal como'l tiempu, l'esfuerciu y el ciñu que punxe al escribir cadún de los 52 cuentos», señala.

Martínez Olái revela alrodiu del procesu d'escritura que «normalmente lo que faigo ye construyir el relatu a partir del final y del xiru que-y quiero pegar, voi dando asina forma al restu de la narración, trabayando dende esa base». Al autor llangreanu lláma-y l'atención el fechu de que'l xéneru breve nun seya ún de los más transitaos polos autores actuales na nuestra llingua: «Sinceramente estráñame y nun soi a entendelo, porque parezme un xéneru mui asequible a la hora d'escribir. Partiendo de que na lliteratura asturiana nun hai autores profesionales, nel sentíu de que puedan vivir de la so obra, diba ser más lóxico qu'hubiere más llibros de relatos que noveles y non al revés como pasa agora, con una cifra al añu que, per otru llau, ta bastante bien pa una lliteratura como la nuestra». Al empar considera que «tamién ye un formatu qu'a la hora de 'vende-ylo' a una persona pa qu'escomience a lleer abúltame más fácil y afayadiz qu'una novela de doscientes páxines, coles que se puede asustar esi posible llector.La poesía, polo que se ve, tien un pequeñu públicu al que-y gusta, pero después cuesta llegar a la mayor parte de la xente, pol mieu infundáu que se siente avezadamente pa cola poesía y el teatru, cuento que somos más de velo, que de lleelo. Por eso el relatu parezme una bona manera de llegar a más públicu»,opina.

Preguntáu sobre'l predominiu de la narrativa de fantasía o d'otros xéneros asemeyaos como'l terror o la ciencia ficción ente los autores de la so xeneración y si se siente venceyáu a esa corriente, el llangreanu espresa que «la sensación de que ta de moda sí que la tengo, nun sé si pasa namás na lliteratura asturiana. Como profe sí puedo costatar que lo que suelen lleer los chavales de 14 o 16 años ye lliteratura fantástica y soi consciente que la xente de la mio xeneración ye bastante consumidor d'esa lliteratura.A mí puede prestame, anque nun ye lo que más lleo y a la hora d'escribir ye poco lo que pueda haber de fantástico no que faigo. De toles maneres parezme interesante que s'escriba de too y de cualquier temática siempre que seya de calidá».

L'autor de 'Fuxir' camienta, dende la so doble condición d'escritor y docente, que l'espardimientu y valoración de la lliteratura asturiana ta venceyáu a que la mesma llingua tea nuna situación de normalización social dafechu: «Igual que güei los nenos empiecen a familiarizase cola llectura en castellán dende los sos primeros años y después nos graos superiores siguen coles llectures obligatories, lo mesmo diba ocurrir si tuvieren alfabetizaos na nuestra llingua, con una asignatura troncal polo menos, y tamién esi mieu qu'esiste ente la población a nun entender l'asturianu, tampoco nun diba habelu. Con una asignatura optativa como agora ye muncho más complicao. D'eso toi totalmente convencíu», afirma l'escritor.